Янгиликлар

Adliya vaziri o‘rinbosari Andijonda “Huquqiy mahalla” loyihasi bilan tanishdi

Adliya vaziri o‘rinbosari X.Meliyev Andijonda xizmat safari davomida “Huquqiy mahalla” loyihasi doirasida Oltinko‘l tumanining “Dalvarzin” MFYda adliya organi tomonidan amalga oshirilgan ishlar bilan yaqindan tanishdi.

“Dalvarzin” MFYda mavjud 1136 ta xonadonda 1570 ta oila yashab keladi va MFYning aholi soni 6 560 nafarni tashkil etadi (shundan erkakalar - 3 222 ta, ayollar - 3 338 ta). Ishchi guruh tomonidan “Huquqiy mahalla” loyihasini amalga oshirish konsepsiyasini Oltinko‘l tumani “Dalvarzin” MFYda amalga oshirish yuzasidan bir qancha ijobiy ishlar amalga oshirildi.

Jumladan, “Dalvarzin” MFYdagi jami 12 ta ko‘chani viloyat adliya boshqarmasi va tuman (shahar) adliya bo‘limlarining jami 70 nafar xodimlaridan iborat kichik guruhlar yordamida xatlovdan o‘tkazilib, har bir xonadonda huquqiy bilimlarni aniqlash bo‘yicha so‘rovnoma hamda huquqiy muammolarni qayd etish uchun savolnoma o‘tkazilib, har bir fuqaroning fikri, muammolari tinglandi.

Ushbu loyiha mahalla aholisiining adliya idoralariga bo‘lgan ishonchini mustahkamlab, mahalla aholisi ularga berilgan e’tibor va amalga oshirilgan ishlar natijalaridan mamnun bo‘ldi. Sababi, ushbu loyiha mahallada aholini qiynab kelayotgan mavjud huquqiy muammolarning samarali yechim topishiga xizmat qildi.

Xususan, mahallada istiqomat qiluvchi fuqarolar va tadbirkorlarning jami 2 445 ta muammosi aniqlanib, ularning 1993 tasi hal etildi.

Jumladan, 968 ta fuqarolarning “FHDYning yagona elektron arxivi” axborot tizimida mavjud xatoliklari o‘zgartirish kiritish orqali bartaraf etildi, tug‘ilish, nikoh, o‘lim va ajrim bilan bog’liq 12 ta huquqiy muammo aniqlanib, 5 ta tug‘ilish va nikoh guvohnomasi berildi va 1 ta ajrim qayd etildi, Kadastr hujjati va meros bilan bog’liq jami 202 ta muammo aniqlanib, 25 ta meros va uy-joy hujjatlari rasmiylashtirib berildi.

Bundan tashqari, 219 nafar shaxslarga (19 nafar 1 va 2 guruh nogironlari, 200 nafar pensionerlar) mulk solig‘i bo‘yicha, 19 nafar nogironligi bo‘lgan shaxslarga daromad solig‘i bo‘yicha imtiyozlar qo‘llanildi. 6 nafar shaxslarga yoshga doir pensiya tayinlandi, 23 nafar fuqaro o‘zini-o‘zi band qilinishi ta’minlandi. 25 ta uyni kadastr hujjatini rasmiylashtirish uchun arizalar kiritildi. 4 nafar fuqaroga nikohdan ajratish, soliq va pensiya masalalari bo‘yicha sudlarga arizalar loyihasi tayyorlab berildi.

Uyma-uy yurilgan holda aholiga 96 ta davlat xizmatlari, 1 ta FHDY xizmatlari, 1 ta meros ishi, 2 ta notarius xizmatlari sayyor tartibda davlat xizmatlari ko‘rsatildi. 17 nafar fuqaro “Mobile-ID” dan o‘tkazildi. 63 nafar shaxslar bepul chuqurlashtirilgan tibbiy ko‘rikdan o‘tkazilib, 6 nafariga respublika va hududiy reabilitatsiya markazlarida bepul davolanishga yo‘llanmalar berilgan bo’lsa, 4 nafar imtiyozga ega shaxslarga bepul dori vositalari berildi, 92 nafar bemorlarga ambulator sharoitda davolanish uchun yo‘llanmalar berildi.

“Mahalla yettiligi” faoliyatida yagona huquqni qo‘llash amaliyotini yo‘lga qo‘yish borasida 24 ta qo‘llanma, 4 ta komissiya tarkibi, 12 turdagi yig‘ilish bayonnomalarining namunaviy shakli tayyorlandi.

Mahalla binosida huquqiy ma’lumot burchaklari va jami 154 ta yuridik va badiiy adabiyotlardan iborat “Adliya kutubxonasi” tashkil etildi. 

Bundan tashqari, mahalla yettiligi uchun “Kambag‘allikdan farovonlik sari dasturi”ni amalga oshirish bo‘yicha va tumandagi yoshlar yetakchilari hamda xotin-qizlar faollari ishtirokida ularga yuklatilgan vazifa va funksiyalar bo‘yicha o‘quv seminarlari tashkil etildi.

Shuningdek, 1710 nafar fuqarolarning fundamental huquqiy bilim darajasi darajasi baholashdan o‘tkazildi va natijaga ko‘ra, ularning huquqiy bilim darajasi o‘rtacha 41,1 foizni tashkil etdi. 1136 ta xonadonda yashovchi fuqarolarga uyma-uy yurgan holda huquqiy tushuntirish berildi va 2610 ta buklet, flaer va infografikalar tarqatildi. O‘tkazilgan targ‘ibot tadbirlariga jami 3 mingdan ortiq aholi jalb etilldi.

Mahalla binosida “Adliya sayli” o‘tkazilib, 78 nafar fuqarolarga qonunchilikdagi imtiyozlar tushuntirildi hamda mahalladagi maktablarda “my.gov.uz” va “id.egov.uz” platformasidan foydalanish bo‘yicha seminarlar o‘tkazildi. Adliya bo‘limida 26 nafar o‘quvchilar ishtirokida “Ochiq eshiklar kuni” o‘tkazildi.

Taqdimot davomida huquqiy muammolarni aniqlash mexanizmlari, ularni hal qilish usullari va kelgusida fuqarolar hayotida takrorlanmasligi bo‘yicha amalga oshirilgan ishlar shuningdek, aholining kundalik huquqiy muammolari yuzasidan qonunchilikka takliflar berildi.

Bundan tashqari, loyiha doirasida mahalla yettiligiga ko‘rsatilgan metodik yordam hamda aholining huquqiy savodxonligini oshirish yuzasidan o‘tkazilgan manzilli targ‘ibot tadbirlari haqida ma’lumotlar berildi.

Vazir oʻrinbosari kelgusida huquqiy muammolarni aniqlashda davlat idoralarining elektron platformalaridagi ma’lumotlardan keng foydalanish bo‘yicha ko‘rsatmalar berdi.

Bundan tashqari, boshqa davlat idoralarida mavjud ma’lumotlarning raqamlashtirilganlik holati hamda elektron platformalar ma'lumotlari to‘liqligi va to‘g‘riligini ko‘rib chiqish masalalariga to‘xtalib o‘tdi.